Јон Фрчкоски, кој e директор во секторот за правни и општи работи во АД за Стопанисување со станбен и деловен простор, во изјава за МИА ги дематираше пишувањата во некои македонски медиуми дека на Арената „Тоше Проески“ во Скопје ќе се игра Светско фудбалско првенство на непризнаени држави и малцински заедници.

Јон вели дека сите заинтересирани за одигрување фудбалски натпревари на стадионот, прво треба да ја контактираат Фудбалската федерација на Македонија.

Во некои македонски медиуми се појавија шпекулации дека Конфедерацијата на независни фудбалски асоцијации во Македонија од 30 мај до 7 јуни ќе организира Мундијал на кој ќе учествуваат 16 репрезентации.

– Ниту сме имале, ниту имаме навестување за барање за одржување на ваков настан на Арена „Тоше Проески“. По шпекулациите во дел од медиумите во врска со овој настан, разговарано е во нашето претпријатие и заклучено дека немаме интенција да го отстапиме стадионот на користење за фудбалски натпревари на било кој субјект, освен на македонски екипи и се разбира на репрезентацијата.

Мислам дека сите други заинтересирани за одигрување фудбалски натпревари на нашиот стадион, прво треба да ја контактираат Фудбалската федерација на Македонија.

ОНИФА објави дека Скопје ќе биде домаќин на нивното фудбалско првенство, кое ќе се одржи од 30 мај до 7 јуни.

КОНИФА (CONIFA) е акроним за Конфедерација на независните фудбалски асоцијации, во која се земји кои не се признаени како членки на Светската фудбалска федерација (ФИФА) ниту од Обединетите нации (ОН), а турнирот ќе се игра од 30 мај до 7 јуни во земјава.

„Не можеме да дочекаме да ги пречекаме сите во прекрасната Македонија!“, стои во соопштението на КОНИФА, која ја сочинуваат територии кои не се признаени ниту од Обединетите нации ниту од ФИФА.