Убиството се случило околу 8 часот изутрината кога во домот на Костовски, родители на неговата сопруга, дошол 50-годишниот Никола П. Со пиштол ги застрелал поранешната сопруга Александра и нејзината мајка Трајанка, објави основното јавно обвинителство од Прилеп. 

– Јавен обвинител во координација со екипи на крим-техника од Министерството за внатрешни работи, изврши увид во куќа на ул. „Александар Македонски“ во Прилеп каде утринава во 8 часот беа пронајдени две безживотни тела. Безживотните тела на А.П. родена 1979 година и нејзината мајка Т.К. родена 1956 година имале прострелни рани. Во нив пукал сега осомничениот, 50-годишниот поранешен сопруг и зет на починатите. Со две прострелни рани се здобило и уште едно лице, брат и син на оштетените Љупчо, кое било во просторијата. Во обидот да биде совладан, повреден е и осомничениот. Повредениот оштетен и осомничениот се пренесени во прилепската болница каде им се укажува медицинска помош, стои во соопштението на Обвинителството.

На местото на убиството изврши увид полицијата  и основен јавен обвинител.