Генералниот секретар на СДСМ Љупчо Николовски, поранешен министер за земјоделство, беше во Ресен, каде што со други членови на партиското раководство се приклучи кон традиционалниот јаболкобер.

Заедно со партиски членови и функционери, денеска присуствував на традиционалниот јаболкобер во Ресен, вели Николовски.

-Тука сме за симболично да им помогнеме на јаболкарите но и да ги слушнеме нивните потреби, коментари и ставови и заеднички да создаваме нови мерки и политики во интерес на земјоделците.

Овоштарството е една од клучните земјоделски гранки на која и посветуваме особено внимание, потенцираше Николовски.

Традиционално, вчера на големиот христијански празник Крстовден, со симболично откинување на првото јаболко во Ресен официјално почна бербата на преспанското јаболко.

На свеченоста, покрај градоначалникот Живко Гошаревски присуствува министерот за земјоделство, шумарство и водостопанство Трајан Димковски, директорот на Агенцијата за финансиска поддршка во земјоделството и руралниот развој Николче Бабовски и постојаниот претставник на УНДП во Македонија, Нарин Сахакјан.

– Очекуваме оваа година наместо за решавање проблеми да разговараме за квалитет и подобар пласман на јаболката. Заеднички да ја постигнеме целта, а тоа е не да го одржиме, туку да го зголемиме производството на јаболка, да имаме промена на асортиментот и јаболката да ги имаме 12 месеци, а не само во сезона. Тоа ќе го направиме со изградба на ладилници и откупно-дистрибутивни центри, нагласи Димковски.