Еден од најдобрите бразилски ракометари, Хозе Толедо, во наредните денови треба и официјално да стави потпис на договорот со Вардар.

Пред само неколку месеци „црни“ беа сценаријата за Вардар, а сега сликата е сосема поинаква. „Црвено-црните“ се актуелни европски шампиони, а во новата сезона ќе влезат со најголеми амбиции – одбрана на тронот.

Потврда на оваа констатација е информацијата дека Толедо, десниот бек на Висла Плоцк е во завршни преговори со раководството на македонскиот шампион.

Толедо е 25 годишен ракометар кој е исклучително висок (193cм), а од голема помош за Вардар би бил во одбраната која е негова специјалност во играта.

Покрај играта во дефанзива, Толедо располага и со разорен удар, а „кариоката“ особено се истакна на јануарскиот Мундијал во Германија каде беше најдобриот играч на Бразил.

Доколку дојде до официјална реализација на овој трансфер, Толедо ќе биде третото засилување за европскиот шампион. Веќе се официјализирани доаѓањата на Русите, Павел Атман и Сергеј Горпишин.