На денешниот брифинг со новинарите, претседателот на Собранието, Талат Џафери, истакна дека доколку Владата достави законски измени за кратење на трошоците на пратениците, тој самиот ќе предложи да се откажат службените возила. 

Тој ја потсети јавноста дека пратениците доаѓаат од различни места во државата и дека ги претставуваат гласачите од изборните единици од кои доаѓаат, па токму поради тоа мора да им се обезбедат нормални услови за работа.

„Очекувам да не добијам таков предлог од Владата, а поединечно не очекувам некој да се откаже од тоа право што е регулирано со Уставот.
Ако добијам таков предлог од Владата, јас ќе поднесам предлог сите да се откажат од службените возила и да одат на работа со тротинет. Па, ќе направиме карикатура од државата. Или ќе правиме држава или ќе си поигруваме со популистички политики кои ни носат дневни поени.Јас повикувам на разум. Овие 120 пратеници се избрани од граѓаните и треба да имаат соодветен статус, а не да се прави карикатура од нив и да се преставуваат како најголемо зло“, рече Џафери.

За потсетување, во февруари годинава, во анализата на Државната комисија за спречување на корупцијата, која ги прибирала податоците анализирајќи ги анкетните листови за имотната состојба на пратениците било посочено дека дваесет и тројца пратеници вршеле злоупотреба на функцијата, однсоно имале сопствени станови во Скопје или станови на име на членови на нивното потесно семејство, а сепак примале надоместоци за да користат автомобил во лична сопственост за да доаѓаат и да си одат од работа од местото на живеење до Собранието.

Во оваа анализа, било пресметано колку пари потрошиле пратениците во периодот од 2015 до 2019 година за патни трошоци за користење автомобил во лична сопственост за доаѓање и враќање од работа. Во овој период, на пратениците им биле исплатени вкупно 178.079.681 денари, или 2,8 милиони евра.