
Живот
Религија
Утре повеќе од 220 учесници ќе се обидат да го фатат светиот крст, кој традиционално ќе биде положен во реката Вардар во Скопје по повод празникот Богојавление-Водици. Овој обред на осветување на водите и поставување на Чесниот крст ќе го организира Скопската православна епархија при Македонската православна црква – Охридска архиепископија (МПЦ-ОА).
Според информациите од епархијата, литургијата ќе започне во 9 часот во храмот „Рождество на Пресвета Богородица“, каде што ќе чиноначалствува архиерејот Јосиф. По завршувањето на службата, во 11:30 часот, архиерејот и свештенството ќе тргнат кон мостот „Слобода“, каде што ќе започне обредот на водосвет, а потоа ќе се положи крстот во реката Вардар.
Околу пладне, поглаварот на МПЦ-ОА, архиепископот г.г. Стефан, ќе го фрли светиот крст во водите на реката Вардар по повод празникот Богојавление-Водици.
Овој празник се слави од вториот век и во христијанската традиција се верува дека на денот на Богојавление Свети Јован Крстител го крстил Исус Христос во реката Јордан. Празникот е познат и како Водици поради големиот водосвет што се извршува на овој ден.
Според народните верувања, оној кој ќе го фати крстот ќе има среќа и благослов цела година. Се смета дека фаќањето на крстот ја симболизира врската помеѓу човекот и Христос, а исто така, се верува дека со осветувањето на водата, таа станува лековита.
»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.