Градоначалникот на град Скопје пред два дена на прес конференцијата на Град Скопје истакна дека големиот православен празник Божиќ  треба да се помести, и да се слави заедно со католичкиот.

Шилегов тогаш истакна дека со божиќните пости се расипува новогодишната атмосфера бидејќи постот завршува по Нова Година.

„Знам дека 85 % од луѓето го мислат истото, мене ми е сеедно кога ќе се слави Божиќ, ама ако сакате да има празнична, новогодишна атмосфера, тогаш нека го преместат. Не ми е јасно како може да има божиќен пост, а да се слави Нова година“, изјави Шилегов.

Телевизија Алфа за ваквот предлог на Шилегов побара став од МПЦ-ОА.

Како што објави телевизијата, на ова прашање портпаролот на Синодот, владиката Тимотеј нервозно му порача на градоначалникот да не се меша во црковните работи.

-Ако сака нека си го слави тој на 25-ти декември. Радоста е на црквата и верниците, а не на политичарите, кусо порача портпаролот на МПЦ-ОА, г.Тимотеј.

За сега МПЦ-ОА не планира да оди по стапките на други православни земји кои ги сменија датумите на празниците, туку реши заедно со  Србија, Русија и Украина да биде меѓу последните кои се уште се водат по Јулијанскиот календар.