Утрово преку соопштение до медиумите ЕСМ соопшти дека 60 годишен работник во рудникот Суводол го загуби животот.

Со длабоко жалење известуваме дека синоќа при несреќен случај во Рудникот Суводол во РЕК Битола, при работа со градежна машина, животот го загуби 60 годишен работник.

Во моментот на несреќата, работникот беше ангажиран на извршување на редовни работни активности. Стручните служби на РЕК Битола и надлежните органи се на терен за расчистување на околностите под кои се случи несреќата. Телото ќе биде предадено на обдукција, по што ќе се знаат и причините за смртта на работникот.  Јавноста ќе биде известена за наодите по завршувањето на законски предвидените дејствија“ стои во соопштението на ЕСМ.

Рударско-енергетскиот комбинат Битола или скратено РЕК Битола е најголемата подружница во составот на АД Електрани на Македонија и се наоѓа на периферијата од Пелагонија, во општината Новаци во близина на Битола.

Комбинатот, чија основна дејност е производство на електрична енергија и јаглен, е најголем во системот на македонското електростопанство и е составен од две производствени единици: ПЕ Рудници (Суводол и Брод Гнеотино) и ПЕ Термоелектрана.