Во Италија досега се испитани скоро 50 проценти од вработените во училиштата за вирусот „ковид-19“, што е околу 500.000 наставници и не-наставен училишен персонал, а 2,6 проценти од испитаните, или околу 13.000 лица, се позитивни на вирусот.

Ова се податоците објавени од канцеларијата на италијанскиот специјален комесар за вонредни ситуации, Доменико Аркури.

Повеќето тестови биле спроведени во Ломбардија, каде биле тестирани 70 проценти, додека Сардинија била на последното место со пет проценти, а извештајот не го вклучува регионот на Лацио, кој го спроведе тестирањето независно, наведува агенцијата Анса.

Се очекува на 24 септември процентот на тестирани работници во училиштата на територијата на Италија да се зголеми на 60 до 70 проценти.

Како што беше најавено, од 14 септември, кога ќе започне училишната настава во поголемиот дел од Италија, ќе се доставуваат околу 11 милиони заштитни маски дневно, што ќе бидат потребни за учениците да влезат во училиште.

Бројот на нови случаи на дневна основа во Италија продолжува да расте, а според последните податоци, регистрирани се 1.597 нови случаи на ковид-19.

Во исто време, се разгледува можноста за скратување на траењето на карантинот во Италија од 14 на десет дена, за што ќе одлучува Научниот и техничкиот комитет на состанокот закажан  во вторник.

Препорака на Светската здравствена организација (СЗО) е 14-дневен карантин, заснован на достапни податоци за период на инкубација во просек од четири до пет дена, со горна граница од две недели.