Седумдесет и пет македонски граѓани чекаат да бидат евакуирани од Авганистан, откако талибанците ја презедоа контролата врз Кабул и денеска прогласија победа.

Според министерот за надворешни работи, Бујар Османи, првата група од 25 македонски граѓани наскоро ќе полета со авион на американската војска за Катар, а уште 25 се регистрирани за некој од следните летови и тие моментално се во американска база во близина на аеродромот во Кабул.

Османи вели дека се на безбедно и се на листата на чекање за трансфер до аеродромот и евакуација.

Во однос на привременото примање на бегалци од Авганистан во државава, каде треба да го чекаат трансферот во САД, од Владата велат дека се чекаат детали за преземање на шест жени и деца вработени во мисијата на ОН во Авганистан, како и за 180 граѓани и нивни семејства од невладини организации и слични здруженија.

Владата работи на организирање на сместувачки капацитети во мотели, одморалишта и хотели за што трошоците ќе бидат обезбедени од меѓународните организации како и од САД. Сместувањето ќе биде со ограничен период, се до нивниот трансфер во САД или во трети земји.