Државниот јавен обвинител Љубомир Јовевски денеска изјави дека надлежните правосудни органи до обвинителството не ги доставиле бараните снимки од Албанија во врска со бегството на поранешниот премиер Никола Груевски. Едно од образложенијата, според Јовевски, било дека системот за снимање не можел да ги чува сите снимки.

– Во врска со снимките, односно меѓународната првна помош која беше побарана од надлежните правосудни органи на Република Албанија, како што извести Обвинителството, две службени лица престојуваа таму, но по барањето за меѓународна правна помош не е постапено целосно, така што снимките не се обезбедени – изјави денеска Јовевски.

Причините за тоа, рече, ќе се видат во понатамошниот тек од постапката, но важно е дека во овој момент снимките што ги бараше јавниот обвинител не се доставени.

Запрашан дали тие снимки биле избришани, Јовевски само кусо рече дека тие уреди работат автоматски.

Јавноста ја покренува дилемата дали намерното или ненамерното бришење на доказите е дел од план на организирано бегство на Груевски каде е инволвирана и актуелната власт бидејќи одговорност кај никој не е утврдена.