Премиерот Зоран Заев на својот Фејсбук профил напиша дека припадниците на републичките сили за заштита кои помагаа во Албанија по катастрофалниот земјотрес ја заслужуваат нашата највисока почит и поддршка за нивната стручност и храброст.

-Од име на сите граѓани на нашата држава, сакам да упатам неизмерна благодарност кон републичките сили за заштита и спасување, кои координирани од Дирекцијата за заштита и спасување, беа присутни во најпогодените подрачја во Албанија од катастрофалниот земјотрес.Нашата држава е држава на солидарност. Скопјани уште живо се сеќаваат на катастрофалниот земјотрес од 1963. Тогаш со помошта на нациите од целиот свет го изградивме повторно главниот град.Припадниците на републичките сили за заштита ја заслужуваат нашата највисока почит и поддршка за нивната стручност и храброст – напиша Заев.

Инаку Македонија во Албанија испрати тим од 41 лице, од кои 35 припадници на Републичките сили за заштита и спасување специјализирани за спасување од урнатини, двајца водичи со кучиња од МВР кои помагаа за пребарување на теренот и четири лица од Црвениот Крст на РМ.

Тимот беше координар од Дирекцијата за заштита и спасување, која ги презема сите потребни организациони подготовки за испраќање помош на настраданото население. Освен тимот, ДЗС испрати и 11 возила со специјализирана опрема за спасување и расчистување на теренот.