На состанокот на лидерите на земјите од Вишеградската група, меѓудругото се зборуваше и за начинот на кој земјите ќе се справуваат со новиот наплив на мигранти, чиј влез во Грција е најавен за скоро. Се очекува скоро 130.00 мигранти да излезат од Турција и преку воден пат да пристигнат во Грција. Европската Унија е децидна дека влезот на мигрантите треба да се спречи и дека територијата на Европската Унија засега не е подготвена да биде прибежиште на нови мигранти. По тој повод Европската Унија најави донација од 700 милиони евра за Грција како поддршка во справување со мигрантите на водените граници со Турција.

Унгарија е децидна дека влез на мигрантите во своја територија нема да дозволи дури и да бидат пропуштени на јужните граници

Од почетокот на мигрантската криза па се до денеска се потврди дека Унгарија воведува најрадикални мерки за штитење на своите гранични премини. Во 2015 и 2016 година, Унгарија беше ѕидот на Евопската Унија и поради оневозможеноста да влезат на европската територија, мигрантите беа заглавени пред унгарските граници. Унгарија и овој наплив на мигранти го очекува подготвена согласно наводите на унгарскиот премиер Виктор Орбан.

Тој најави дека новиот наплив на мигранти е преголемо оптеретување за Европска Унија и е дециден дека Унгарија нема да ги прифати мигрантите, ниту да им дозволи премин преку нивна територија. Орбан апелираше до грчките власти да се потрудат да го спречат влезот на мигрантите по секоја цена, но ако јужните граници не го спречат движењето на мигрантите кон Унгарија, тогаш на унгарската граница, тие ќе се соочат со цврста и непопуслива барикада.

Државите од Балканот можно е да бидат најзасегнати со новиот бран на мигранти 

Засега Македонија не беше силно засегната со Европската Мигрантска Криза, бидејќи земјите од Балканот беа само транзитни подрачја за мигрантите. Ретко кој од мигрантите изразува желба да се задржи во државите од Балканот. Но со оглед на новонастанатата ситуација и затворање целосно на границите од Унгарија, доколку се пропуштат мигрантите во Грција, тие можат да бидат заглавени во државите од Балканот.

Тоа ќе предизвика сериозна криза на државите од Балканот бидејќи нивните капацитети за справување со мигрантите се ниски, а со однос на тоа што не се членки на Европска Унија, поддршката за јакнење на нивните капацитети ќе биде значително послаба.