Министерството за здравство пред дваесетина дена објави телефонски броеви на кои граѓаните треба да се јават доколку имаат симптоми на корона вирусот. Помеѓу мерките кои треба да бидат преземени за превенција, Министерство за здравство ги објасни и постапките за преземање на мерки за заштита на јавното здравје и спречување на процесот на ширење на корона вирусот. По налог на Комисија за заразни болести, секој граѓанин треба да преземе одговорност прво за сопственото здравје, а потоа и за здравјето на другите. 

Превентивните мерки кои треба да се преземат, а се предлог на СЗО можете да ги сретнете во медиумите, социјалните мрежи, но и на јавните простори, граничките премини и патарините низ земјава. Превентивни мерки кои се преземаат се: редовно и темелно миење на рацете со средства за дезинфекција или сапун и вода, конзумирање само на храна која е термички обработена, недопирање на лицето пред да се измијат рацете, избегнување на јавни собири, носење на маски и ракавици доколку природата на работата налага чест контакт со другите луѓе. 

Освен превентивните мерки за заштита, многумина во јавноста апелираат затворање на училиштата и ограничување на движењето на меѓуграничните премини, но и воопшто во јавен простор. Професори и родители сметаат дека самоизолацијата на учениците и студентите дома, може значително да придонесе во спречување на ширење на корона вирусот. Во моментот се разгледува можноста за преземање на нови мерки за заштита од ширење на корона вирусот. 

Потсетуваме дека за контакт по пристигнување во територијата на Република Македонија и при сомнителни симптоми налик корона вирусот патниците да се пријават на броевите за контакт кои се поделени во региони.

Во земјава досега се регистрирани седум случаи на заболени од корона вирус, откако вчера присуството на Ковид-19 беше регистрирано кај директорката на Клиниката за кожни болести, Нина Цаца Билјановска, а подоцна Министерството за здравство информира дека од осумте тестирани пациенти вчера попладне, тројцата членови на семејството на сопружниците од дебарско се позитивни.

Во меѓувреме, поради брзото ширење на коронавирусот од вчера цела Италија е таканаречено „заштитено подрачје” и движењето на луѓето е строго ограничено. Во Италија моментално има 7.985 заразени лица, а 462 лица починаа поради коронавирусот. Само вчера се потврдени 1.592 новозаболени од Ковид-19.