Човекот кој синоќа го демолираше зелениот покрив на Градскиот трговски центар (ГТЦ) во Скопје е газда на хотел кој се наоѓа во трговскиот.

Вработени во ГТЦ за СДК.мк велат дека откако ги виделе снимките од безбедносните камери веднаш го препознале сторителот. Тој, според нив, барал градината што се прави на покривот да се користи како тераса за објектот.

Непознат маж вчера го демолирал зелениот кров на ГТЦ, кој се уште е во изградба. Дел од конструкциите се наменети за зеленило, а дел се за кафулиња и ресторан.

Градоначалникот Петре Шилегов на својот фејсбук профил го објави видеото од безбедносните камери, на кое се гледа лик на возрасен човек кој ги растура градежните работи, поставени на кровот на ГТЦ. „Зелениот кров на ГТЦ…И сторителот!!! Нема да застанеме заради вакви „луѓе”. Скопје ќе го биде. Сакал некој или не!!!“ – напиша Шилегов на ФБ.

Инаку кафеаната и кафулето на кровот на ГТЦ се очекува да имаат атрактивен поглед накај “Жена Парк“ и накај Собранието на Македонија. Кој и да ја земе оваа локација, во самиот центар на градот, би се очекувало да има добра заработка и профит. Освен овој проект кој е во тек, градоначалникот Шилегов е познат по тоа што на почетокот на својот мандат ја врати постојката на автобусот 57 во сутеренот на ГТЦ, што беше свечено прославено со ди-џеј забава и со пригоден коктел за присутните.