Непознат маж го демолирал зелениот кров на ГТЦ, кој се уште е во изградба. Дел од конструкциите се наменети за зеленило, а дел се за кафулиња и ресторан. Градоначалникот Петре Шилегов на својот фејсбук профил го објави видеото од безбедносните камери, на кое се гледа лик на возрасен човек кој ги растура градежните работи, поставени на кровот на ГТЦ. „Зелениот кров на ГТЦ…И сторителот!!! Нема да застанеме заради вакви „луѓе”. Скопје ќе го биде. Сакал некој или не!!!“ – напиша Шилегов на ФБ.

Сепак, зад паролата промовирана од Шилегов како “Зелен кров“ на ГТЦ, изгледа дека се крие и нешто повеќе. Конкретно, се поставува арматура и инсталација за кафеана на кровот на ГТЦ. А против изградбата на кафеана на кровот на ГТЦ во февруари оваа година се изјасни и влијателната Асоцијација на архитекти на Македонија. Многу архитекти кои на времето беа дел од протестите “Гушни го ГТЦ“, сега на нивните социјални мрежи известуваат зошто не е соодветен проектот со кафеана на кровот на ГТЦ. Еден од нив е архитектот Дејан Ивановски, како и архитектката Елена Пискачева, Мила Амски, но и многу други. 

Тие го критикуваат довчерашниот борец за ГТЦ, Никола Наумоски (шеф на кабинет на градоначалникот Шилегов и братичед на министерката Шеќеринска), дека тераат проект што не е добар, но исто и проект за кој нема ни физибилити студија. Асистентката од Архитектонскиот факултет Милка Докузова му коментира на братучедот на Шеќеринска со следниве зборови “Никола (Наумоски н.з.), јас Мила и Дејан сме архитекти и сметам дека сме за нијанска постручни од тебе во проектов. Навистина ми е жал што твоето граѓанско дејствување и активизам, кое го следам од „Плоштад Слобода“, стигна до тука.

Инаку кафеаната и кафулето на кровот на ГТЦ се очекува да имаат атрактивен поглед накај “Жена Парк“ и накај Собранието на Македонија. Кој и да ја земе оваа локација, во самиот центар на градот, би се очекувало да има добра заработка и профит. Освен овој проект кој е во тек, градоначалникот Шилегов е познат по тоа што на почетокот на својот мандат ја врати постојката на автобусот 57 во сутеренот на ГТЦ, што беше свечено прославено со ди-џеј забава и со пригоден коктел за присутните.