Според последното истражување на јавното мислење во седум ЕУ членки, објавено во Лондон, каде граѓаните одговараат која држава треба да биде нова членка на ЕУ, само 24% од Французите би сакале да ја видат Македонија во Унијата, додека 44% се против. Во Данска соодносот е 38% „против“ членството на Македонија во ЕУ, наспроти 30% „за“, додека во Финска 32% не не прифаќаат, а 31% се позитивни за нашиот прием.

Додека очекувано, во големо мнозинство се изјасниле дека во европското друштво сакаат да ги видат Швајцарија, Норвешка и Исланд, за другите аспиранти поддршката е мала, а конкретно за нашата земја резултатите се главно негативни. Само 24 проценти од Французите би сакале да не видат во ЕУ, додека против се дури 44 отсто. И мнозинството Германци, Данци и Финци не ја сакаат земјава во ЕУ.

Во Германија 39% се „против“, 34% се „за“, а спротивно на тоа кај Швеѓаните имаме позитивен скор, 40% поддржуваат прием на земјава, а 27% се против. Францускиот претседател макрон почна кампања во која повикува на заштита на Европскиот континент. Воведување ред во Шенген зоната, исполнување на обврските од сите држави, одговорност, солидарност, почитување на заедничките правила, но проширувањето воопшто не го споменува. Инаку токму францускиот претседател минатата година на Европскиот парламент му порача дека ЕУ треба да размислува за проширување со нови членки само откако ќе претрпи фундаментални реформи.

Инаку БРЕГЗИТ, мигрантите и распределбата на финансиите ги нагризуваат односите меѓу земјите во Унијата, а во пресрет на изборите за Европскиот парламент во мај поделеноста и скептицизмот особено се заоструваат. Во тој правец Макрон речиси драматично им пишува на европските граѓани дека овие избори се решавачки за иднината на континентот и дека никогаш од Втората светска војна наваму Европа не била во толку голема опасност.