Денеска е последен ден од кампањата за претседателските избори. Кандидатите за претседател на државата, Стево Пендаровски и Гордана Силјаноска-Давкова, можат да ги искористат последните часови денеска до полноќ за да ги убедат граѓаните да гласаат за нив, во вториот круг на изборите закажан за 5ти мај.

И Пендаровски и Силјановска очекуваат дека ќе победат на престојните избори. 

Пендаровски, на неколку наврати изјави дека доколку граѓаните го поддржат на изборите тоа за нив ќе значи подобра перспектива и сигурен пат во Европа, продолжување на реформите и заедничкиот пат кон напредокот, развојот и интеграцијата во НАТО.
Во недела имаме можност да донесеме историска одлука – да ја запечатиме европската иднина на нашата земја. Не смееме да седиме дома, со тоа ги казнуваме сите следни генерации. Нема веќе враќање назад, да се обединиме, сложно и решително да зачекориме, напиша Стево на Фејсбук.

Неговата противкандидатка Силјановска чиј главен адут е владеењето на правото очекува најпрво нашата држава да се реформира во секој поглед и на неколку пати изјави дека реформите треба да почнат од врвот.Таа на својата Фејсбук страна објави дека неможе една држава економски да расте ако нема владеење на правото.

Нема економски и политички развој без владеење на правото. Само со право и правда се оди напред. Преспанскиот договор не го решава конечно спорот за името затоа што го руши домашното и меѓународното право. Македонија заслужува право и правда. Мојата држава за мене беше и ќе остане Република Македонија!

Изборниот молк ќе почне на полноќ. За време на 24-часовниот молк ќе гласаат затврениците, болните и немоќни лица, внатрешно раселените и во дијаспората. В недела право на глас ќе имаат 1.808.131 граѓанин запишани во Избирачкиот список.