Македонскиот ракометен првак Вардар со неверојатна игра во второто полувреме успеа да ја совлада Барселона во Келн. Македонскиот тим се врати од седум голови негатива и утре во финалето со Веспрем ќе се бори за шампионската титула.

За вечерашниот натпревар никој не се надеваше дека македонскиот тим ќе може да направи чудо, но ете се случи, Вардар уште еднаш не направи горди.

По неверојатниот пресврт во Келн кои го направија ракометарите на Вардар во последните четири минути од натпреварот, вардарци утре ќе го играат своето второ финале во Лигата на шампионите.

Противник на црвено црните ќе биде Веспрем, на завршниот меч од ракометната Лига на шампиони за сезоната 2018/19. Натпреварот  ќе се игра утре во Келн со почеток во 18 часот.

Инаку за посветеноста и љубовта кон клубот говори и херојскиот потег на Игор Карачиќ на крајот од натпреварот, кој заигра на мечот и покрај тоа што бил болен.

„Три дена тренирам со 39 температура, не знам можеби дехидрација е во прашање. Не знам што е. Некаде околу 50. минута почувствував грчеви на двата листа и на крајот на шут едноставно ме пресече. Ќе видам што е кога ќе отидам во болница“, објасни Хрватот пред натпреварот.

По натпреварот тој во изјава за екипа.мк истакна дека за него Вардар е најголемо богатство.

„Одиграа одлично во првото полувреме, но ние покажавме карактер и успеавме да се вратиме. Благодарност до сите што ни даваат поддршка во овој период, да не се повторуваме за сите проблеми со кои се соочуваме. Покажавме и квалитет и карактер и го победивме моќниот противник. Се фалеа „Ние сме Барса“ како нивни слоган, епа „Ние сме Вардар“ и сите видоа што значи тоа. На ред е Веспрем, тим што како и Баселона е преполн со врвни ракометари, но ќе сториме се за да стигнеме до трофејот“ – порача хрватскиот ас во дресот на Вардар.