Белорусија ќе и се обрати на Русија со барање да го врати нејзиното нуклеарно оружје доколку САД распоредат нуклеарно оружје во Полска или Литванија, изјави денеска претседателот на Белорусија Александар Лукашенко.

Лукашенко ја спомена оваа можност за време на телефонскиот разговор со неговиот француски колега Емануел Макрон, пренесе ТАСС.

„Доколку САД или Франција го преместат нуклеарното оружје во Полска или Литванија, односно до нашите граници, ќе апелирам до мојот руски колега Владимир Путин да го врати оружјето што некогаш безусловно го предадов“, рече Лукашенко.

На петтиот ден од воените судири руска и украинска делегација седнаа на преговарачка маса.

Додека околу Киев, на истокот и на југот на Украина продолжува да се води жестока битка, домаќинот, белорускиот министер за надворешни работи Владимир Макеј на двете страни им посака постигнување на брзи резултати.