Маж се бори за живот по тешката сообраќајна несреќа што се случила вчера наутро во 07:00 часот во село Долно Палчиште тетовско.

Управувајќи со патничко возило “БМВ” со тетовски регистарски ознаки И.К. [ 54 ] од село Долно Палчиште излетал од патот и удрил во бетонски ѕид.

Од ударот И.К. се здобил со тешки телесни повреди и бил пренесен во Клиничка болница Тетово од каде како итен случај во неконтактибилна состојба бил префрлен во Ургентен центар при комплексот клиники “Мајка Тереза” – Скопје каде бил задржан на лекување и се наоѓа во животна опасност.

Увид на местото извршиле Јавен обвинител и екипа од СВР Тетово.

Единаесетгодишно момче е тешко повредено откако автобус удри во него.

Сообраќајката се случила вчера во 19:40 часот на улица “Едвард Кардељ” во Струга кога автобус “Ивеко” со струшки регистарски ознаки управуван од Г.П. [ 57 ] од село Мислешево струшко удрил во велосипед управуван од 11-годишното момче од Струга.

Од ударот детето се здобило со тешки телесни повреди и со возило на Итна медицинска помош Струга бил пренесен во болницата “Св.Еразмо” – Охрид каде му била укажана лекарска помош и бил задржан на понатамошно лекување.

Увид на местото на настанот извршила екипа од Полициската станица Струга.