Владата одлучна во одлуката, невакцинирани првачиња да не се запишуваат во училиште.

Според одлуката нема да бидат запишани во училиште, децата на кои родителите нема да прикажат потребни документи и не покажат исполнети вакцинални картони. Уписите започнаа денес а децата кои не ги исполнуваат условите во септември нема да можат да тргнат во прво одделение.

„Од оваа учебна година нема да можат да бидат запишани првачиња коишто нема да достават картон за вакцинација. Вакцинацијата е задолжителна.“ кажа Миле Бошњаковски, портпарол на Владата на РСМ.

На ваквата одлука на Владата, на забраната деца кои не се вакцинрани, да не бидат примани во градинка или во училиштата, реагираше првата детска амбасада во светот „Меѓаши“.

Ниедно дете не смее да биде исклучено од образовниот процес, без оглед на здравствената состојба или вакциналниот статус. Свесни сме дека во состојба на епидемија јавното здравје има приоритет и државата мора да преземе соодветни мерки со цел да го заштити населението и истото го поддржуваме, но државата мора да најде соодветни форми и механизми со кои ќе обезбеди грижа, згрижување, образование на сите деца, се вели во соопштението на „Меѓаши“.

Според детската амбасада „Меѓаши“, родителите треба и мора да бидат целосно информирани за значењето на имунизацијата, но и за сите позитивни и негативни ефекти од истата, како и информации за квалитетот и безбедноста на вакцините.