Не стивнува епидемијата од мали сипаници. Изминативе две недели е регистриран нов случај на мали сипаници. Се работи за дете кое не ја примило вакцината МРП, на возраст до четири години од Скопје а случајот е лабораториски потврден.

Со овој случај, заклучно до 1 ноември во државава се регистрирани 1.901 случај на мали сипаници со стапка на заболување од 91,9 на 100.000 жители. Од Институтот за јавно здравје информираат дека сé уште е во тек епидемија на мали сипаници.

Во извештајот што на својата веб страница го објави Институтот за јавно здравје,  според резултатите од примероците испратени во референтната лабораторија за мали сипаници во Луксембург, циркулира генотипот B3 Dublin, кој го има и во соседните држави.

Во текот на 42. и 43. недела во државата вакцинирани се 1.123 деца (од предучилишна и училишна возраст). Вкупниот број вакцинирани лица на возраст до 14 години со МРП вакцина од почетокот на епидемијата изнесува 42.746 (во прикажаниот вкупен број вакцинирани се вклучени и пропуштените и редовно вакцинираните деца со МРП вакцина), се посочува во извештајот на Институтот за јавно здравје.

Од почетокот на епидемијата, па досега, во центрите за јавно здравје дополнително се аплицирани 6.295 дози на вакцина, од нив повеќе од 60 отсто кај здравствени работници, студенти и ученици во средните медицински училишта, а останатите се лица на возраст над 14 години.