Ивор Мицковски, поранешниот прв човек на Центарот за комуникации во СДСМ на својот Фејсбук профил ја коментираше изјавата на премиерот Зоран Заев. Тој преку статус се обраќа до премиерот и  пишува дека е срамота што Заев се фали дека има поранешен обвинител и сопственик на телевизија во притвор.

-Не е бе Зоки за фалење дека имаш бивш обвинител, скриен сопственик на телевизија, така да кажам провладин тип во притвор.
Срамота е што дозволивте скриен сопственик и дубиозна телевизија да работи, што ставивте сомнителен обвинител да решава криминали, и што дозволивте провладини квазигазди со кои се дружите и од чии студиа не излагавте, да рекетираат.
И секако, што се криете сите што сте политички инволвирани…, стои во неговиот пост на Фејсбук.

Инаку вчера премиерот Заев во интервју за магазинот Детектор на ТВ „Сител“ изјави дека тоа што обвинител и газда на провладин медиум се во притвор ќе ја зголеми довербата на граѓаните.

 – Според мене ќе остане печатот на зголемена доверба кон институциите и политичарите. Заради тоа што навистина претставува случај каде што недвојбено, без резерва на било кој се става силен печат на независноста на правосудниот систем, во овој случај на Јавното обвинителство. Растеретено од било какви притисоци да истера истрага за вака висока корупција. Самиот случај покажува дека има еве обвинител во притвор, газда на медиум, провладин, така да го кажам во притвор. Сето тоа е сериозна порака дека институциите, без разлика кој се инволвирал, за кој што постојат индиции за одредена инволвираност во одредени кривични дела треба да си одговара и ќе си одговара во државата. За мене тоа е многу значајно“ – вели Заев во интервјуто за магазинот Детектор.