Мицкоски: Лажат дека со промена на Устав ќе влеземе во ЕУ, се однесуваат како полтрони и кон Бугарија и кон меѓународната заедница

Однесувањето на власта кон меѓународната заедница вклучително и кон соседите е полтронско однесување, поданичко однесување и на тој начин не се гради партнерски, ниту пак добрососедски однос. За да се гради партнерски однос и добрососедски мора да имаме двонасочна улица, истакна претседателот на ВМРО-ДПМНЕ Христијан Мицкоски во емисијата „Клан Директ“ на телевизија Клан.

Мицкоски продолжи и додаде дека лага е дека со промена на Уставот дека Македонија ќе е членка на ЕУ.

Лага е дека со промена на Уставот како што тоа го замисли актуелната Влада дека Македонија ќе биде членка на Европската Унија, не е точно тоа е лага. Секој кој што таа пропаганда ја шири, лаже, безочно лаже и се обидува да ги манипулира граѓаните. Зошто? Затоа што оваа Влада прифати во Преговарачката рамка делови да бидат билатералните договори со официјална Софија и Преспанскиот договор со официјална Атина. Последиците денеска ги гледаме и благодарение на брзата и навремена акција на Панче Тошковски барем немаме редици за чекање, го немаме оној метеж кој беше во времето на Оливер Спасовски, тие се последиците, вели Мицкоски.

Дури и да на насилен пат се обидеа, а не успеаја бидејќи ВМРО-ДПМНЕ рече ние ќе се спротивставиме и се спротивставиме иако притисоците беа жестоки. Се спротивставивме останавме кохерентни, обединети заедно сите затоа што веруваме во ова што го прави и направи оваа Влада е погрешно. Прво ја лажеа меѓународната заедница дека ова што го прифаќаат ќе го испорачаат, второ го лажат сопствениот народ и граѓани дека со промена на Уставот, Македонија станува членка на Европската Унија, не е така, не е точно, кажа Мицкоски.

Секоја позиција и секој став треба да биде придружен со логични аргументи кои се издржани а не аргументи како дело на политиканство и тоа е така уште од Римското право не сум го измислил јас, ниту сум правник, но ете сум читал така било од Римското право дека ставот кој е поддржан со аргументи преовладува затоа ние мора да имаме став и да го браниме тој став, но и да имаме аргументи за тој став. Ценам дека ние како ВМРО-ДПМНЕ нашиот став го аргументиравме, на отворена сцена прифативме неколку концепти за решавање на овој спор. Очигледно дека сегашната актуелна власт не беше способна и ја излажа меѓународната заедница да испорача резултати. Ние за разлика од власта дадовме најмалку 3 концепти како треба да се реши според нас ова прашање. Подготвени сме да продолжиме да разговараме, да ги доближуваме ставовите и еднаш засекогаш ова прашање да се реши затоа што на самиот почеток кажав дека овој народ, овие граѓани дадоа премногу за тие европски вредности, а добија се уште ништо споредено со сите други народи во рамките на Централна и Источна Европа кој во минатото беа дел од Варшавски пакт односно беа комунистички држави, заклучи Мицкоски.