Германската десничарска партија, Алтернатива за Германија (АфД) стана втора политичка сила во земјата преземајќи ја позицијата од социјал-демократската партија (СПД).

Тоа го потврдуваат резултатите на најновите анкети спроведени во Германија. Растот на популарноста на АфД доѓа само неколку денови по насилните конфликти меѓу приврзаници на левите и на десните партии во градот Хемниц.

Ројтерс пренесува дека на вакви конфликти, Германија не сведочела со децении.

Според резултатите од анкетата на ИНСА, АфД моментално има поддршка од 17%, додека СПД падна на 16%. Владејачкиот конзервативен блок на Ангела Меркел и натаму е во водство со поддршка од 28,5%.

Меркел веќе со денови молчи за случувањата во Хемниц, а во јавноста доаѓаат само изјавите од нејзиниот портпарол.

Од кабинетот на канцеларката наведуваат дека Меркел планира посета на Хемниц, но се уште не се прецизира датумот на евентуалната посета. Се шпекулира дека таа стравува дека таму ќе ја пречекаат илјадници демонстранти, што дополнително би ја ослабнало нејзината слаба политичка позиција.

Но, Хемниц, секако, има и друга страна.

Синоќа во градот се одржа рок концерт насловен „Против ксенофобијата“, на кој настапија мнозинство лево-ориентирани музички групи, а беше посетен од околу 65 илјади граѓани.