Митко Чавков во петок ќе биде осуден на драконска казна од 14 години затвор. Ова го смета Сашо Дуковски, адвокатот на Чавков, кој цени дека потегот со носење во притвор пред изрекувањето на пресудата, и покрај дадената гаранција, сугерира дека пресудата е веќе донесена. Инаку, во судските кулоари се зборува дека пресудата која ќе ја изрече судијката Кацарска, се поклопува со политичките желби на премиерот Заев, бидејќи Заев му бил многу лут на Чавков за случајот “Поткуп“ во кој беше откриено дека како градоначалник на Струмица барал евра за легализација.

Кривичниот совет го прифати предлогот на Обвинителството и на на Чавков синоќа му определи мерка – притвор во траење од 30 дена, по што тој бил приведен и однесен во истражниот затвор.

Чавков е обвинет за настаните во Собранието од 27 -ми април 2017 година, за кој главната расправа е завршена и е закажано рочиште за објавување на пресудата.

Меѓу обвинетите за тероризам е и оперскиот пејач Игор Дурловски, кој цел судски процес го смета за една политичка монтажа и затоа не ни побара амнестија согласно законот кој го изгласа Собранието.