На вчерашната владина седница имало кавга за СЈО. Министерката Дескоска, според нашиот извор од владата, предлагала СЈО да биде надлежно за истрагите отворени по рокот од 30 јуни 2017 година, вице-премиерот Бујар Османи бил против, додека министерот за надворешни работи Никола Димитров, кој себе си се гледа како можен коалиционен кандидат за претседател, предложил ова прашање за трансформацијата на СЈО да се разгледува после завршувањето на претседателските избори. Министерот Бујар Османи го потенцирал и начелното правно мислење на Врховниот суд кој пресече дека по рокот од 18 месеци, СЈО не може да отвора истраги и да покренува обвиненија.

Предлог-законот што го изготвила Дескоска предвидува СЈО да биде под државното обвинителство, но сепак со своја автономија за покрупните случаи за организиран криминал, да се застапува самото во прв и втор степен пред судовите, а во трет степен пред Врховниот суд, тоа да го прави обвинител од Јавното обвинителство. Предистражните постапки кои ги започнало СЈО, може да ги преземе и Обвинитеслтвото за гонење организиран криминал и корупција во согласност со надлежноста.

За да помине предлог-законот за СЈО треба „за“ да гласаат 80 пратеници, кои власта тешко дека ќе може да ги обезбеди во овие околности. Една од причините поради кои ДУИ се колеба да го поддржи новиот закон за специјалното јавно обвинителство е фактот дека за лидерот на ДУИ, Али Ахмети е отворена истрага со кодно име „Попис“, како и за вицепремиерот Бујар Османи, истрагата „Пациент“, но се дознава дека одредени истраги во почетна фаза се водат и за двајца поранешни градоначалници од редовите на ДУИ.

Неофицијално, дел од осумте “независни“ пратеници во Собранието би дале согласност за овој предлог-закон, но тоа не би било доволно без поддршка на сите осуммина. Заев сепак ќе се потруди да им удоволи на барањата на обвинителите од СЈО, бидејќи е свесен дека тие му ја завршија најголемата работа за неговото доаѓање и опстојување на власт.