Властите на украинскиот регион Лавов усвоија регулатива со која во областа се забрануваат книги, филмови и песни на руски јазик.

Законодавниот дом изгласа “да се наметне мораториум на јавното изведување и употреба на содржини на руски јазик” додека Русија не ги повлече сите свои трупи од Украина, пренесе Вашингтон пост.

Не е познато како забраната ќе биде спроведена.

Русија го анектираше Крим во 2014 година и ги поддржа бунтовниците на истокот на земјата. Сепаратистичкото движење во голем дел било водено од стравувањата дека новата украинска влада ќе ги дискриминира руските говорници.

Лавов е најголемиот град во западна Украина, и иако поголемиот дел од населението во областа зборува украински, рускиот исто така широко се користи.