За случајот со набавката на луксузниот мерцедес од 600 илјади евра, каде е осуден Никола Груевски на казна затвор од две години, неговиот адвокатски тим вчера поднел жалба за оложување на издржувањето на казната. 

Претходно одбраната на експремиерот по одлуката на Апелацискиот суд со која се потврди одлуката на Кривичниот суд, поднесе жалба за одложување на затворската казна која беше одбиена од страна на судијата одреден за извршување на санкција.

За овој случај утре треба да заседава и Комисијата за деловнички и мандатно-имунитетни прашања чиј претседател е Павле Богоевски. Оваа комисија може да предложи да се одземе мандатот или имунитетот на пратеник. Потоа препораката од Комисијата се доставува до Собранието. 

За одземање на мандатот потребно е двотретинско мнозинство, кое е тешко достижно со оглед на тоа што 8-те пратеници од новата пратеничка група, соопштија дека нема да поддржат таква одлука.