Јавно се говори дека лекарите и медицинскиот персонал масовно ја напуштаат државата во потрага за подобар живот, додека министерот за здравство си тера по старо, носејќи го системот пред колапс.

Цела година, 25-те ангажирани лекари во кол центарот кои деноноќно со совети им помагаат на пациентите, работат без пари. Од јануари досега не земале ниту денар, а неделно имаат повеќе од пет илјади јавувања.

Петмина од нив веќе се откажале од ангажманот, бидејќи не сакаат да работат без финансиски средства. Револтираните специјалисти на здравствените власти им даваат рок од еден месец да им ги исплатат сите заостанати плати, или повеќе нема да дежураат.

Од Министерството за здравство велат дека со ребалансот на буџетот биле предвидени пари за “Ало докторе” и ќе ги регулирале заостанатите обврски. Но лекарите велат дека тоа ветување го добивале од јуни досега.

“Ало докторе” почна со работа на 15 септември 2014 година, дваесет и четири часа се достапни за граѓаните кои имаат потреба од здравствени совети. Со нивното четиригодишно функционирање е олеснета работата на скопската брза помош.

Претходната власт, “Ало докторе” го отвори со цел граѓаните од цела држава да добиваат совети за болеста и симптоматска терапија и со тоа да го растеретат притисокот на Брза помош.

Првите неколку месеци, на телефонските јавувања одговараа и директорите на скопските клиники. Помош преку телефон барале и Македонци кои живеат во странство.