Американскиот претседател Џо Бајден побара од безбедносните и разузнавачките служби да ја испитаат заканата од насилен екстремизам во САД, беше објавено од Белата куќа, откако маса демонстранти кои го поддржуваа поранешниот претседател Доналд Трамп насилно упаднаа во американскиот капитол.

„Нападот врз Капитол на 6 јануари и трагичната смрт и уништувањата што се случија го подвлекоа она што сите го знаеме: подемот на насилниот екстремизам е сериозна и растечка закана за националната безбедност“, изјави портпаролот на Белата куќа Псаки.

Таа истакна дека се потребни нови пристапи и дека ова прашање е приоритет на новата американска администрација.

Треба да се стори повеќе. Затоа претседателот го инструира националниот тим за безбедност да ја изврши оваа анализа во текот на вториот ден од функцијата”, рече Псаки.

Проценката на оваа закана треба да биде извршена од Кабинетот на директорот на Националната разузнавачка служба, ФБИ и Одделот за национална безбедност и ќе се користи како основа за понатамошно постапување по ова прашање, објави Белата куќа.