По самитот Кипар-Египет-Грција во Никозија, грчкиот премиер Кирјакос Мицотакис ја обвини Турција за кршење на меѓународното право и оцени дека Анкара има „империјалистички фантазии“.

„Анкара има империјалистички фантазии и се обидува да ги реализира со воинствено однесување од Сирија до Либија, од Сомалија до Кипар, од Егејот до Кавказ.

„Тоа го поткопува спроведувањето на меѓународните договори и истовремено ја нарушува регионалната безбедност, честопати кршејќи ги одлуките на Советот за безбедност на ООН и ЕУ“, рече Мицотакис на заедничката прес-конференција по 8-миот самит Кипар-Египет-Грција во Никозија.

Тој исто така оцени дека само либискиот народ може да најде политичко решение за граѓанската војна во нивната земја, без присуство на странци на нивна територија, потенцирајќи дека Грција е подготвена да придонесе за мирната иднина на Либија.

Премиерот Мицотакис се осврна на договорот меѓу Грција и Албанија и посочи дека „Грција во пракса докажува дека Балканот и источниот Медитеран можат да станат региони на мир и стабилност доколку се почитуваат законите“.