Откако денеска излезе и трета снимка, во која наводно се слуша дека и специјалната обвинителка Катица Јанева е вмешана во случајот Рекет таа се огласи во врска со снимката велејќи дека со бизнисменот Орце Камчев преговарала за да стане соработник – сведок во една нова предистрага која ја водело Обвинителството, објави ФОКУС.

Обвинителката во врска со најновата снимка која беше оббјавена денеска од весникот Ла Верита, истакна дека во интерес на предистрагите и истрагите кои се водат во Jавното обвинителство на чиј прв човек беше токму таа, повеќе пати разговарала со разни лица, во обид да се издејствуваат подобри позиции во кривичните предмети. Јанева истакна дека тоа често се случувало преку од нив назначени посредници.

„Во конкретниот случај, во тој период, се водеа преговори од моја страна со лицето О.К. да стане соработник – сведок во една нова предистрага која ја водевме во Обвинителството, заедно со еден од моите помошници обвинители. Ги повикувам истражните органи што е можно побргу да ја завршат истрагата, да ги приберат сите докази и да ги завршат сите форензички вештачења поврзани со случајот „Рекет“, за целосно расчистување на овој случај и обелување на моето име – вели Јанева.

За потсетување, во денешните аудио разговори поврзани со случајот „Рекет“, во дел од разговорите меѓу првоосомничениот Бојан Јовановски – Боки 13 и бизнисменот Орце Камчев се вклучува и Јанева, говорејќи за други обвинители во СЈО и за текот на постапката „Империја“ и враќањето на пасошот на бизнисменот Камчев.