На денешната седница на собраниската Комисија за прашања на изборите и именувањата претседателот на Комисијата Илија Димовски информираше дека до Комисијата стигнал допис од адвокатката на поранешната специјална јавна обвинителка Катица Јанева, во кој што се бара да и се одреди апанажа.

Во образложението на адвокатката на Јанева до Комисијата се наведува дека нејзиното барање е врз основа на законските можности кои не забрануваат и не исклучуваат можност притворени или разрешени функционери да бараат апанажа.

Катица Јанева е една од обвинетите во случајот „Рекет“ заедно со Бојан Јовановски и Зоран Милевски.

За потсетување, Со 102 гласа „за“, пратениците во Собранието ја разрешија од функција специјалната јавна обвинителка Катица Јанева. Вкупно беа присутни 105 пратеници на седницата. Немаше воздржани, ниту против.

Од 29 пратеници кои им припаѓаат на малцинствата, 27 гласаа за разрешување од функцијата специјалната јавна обвинителка.

Собранието предлогот за разрешување на Катица Јанева ќе го достави до Советот на јавни обвинители.

На 5. септември, Комисијата за избори и именувања зад затворена врата едногласно и без дебата донесе заклучок да му предложи на Собранието да ја разреши Јанева. Одлуката беше донесена врз основа на извештајот на Советот на јавни обвинители за разрешување на Јанева поради нестручно, незаконско и несовесно работење.

Јанева во моментов е во притвор како третоосомничена во случајот „Рекет“.