Македонија се приклучи на Албанија, БиХ, Хрватска, Косово и Турција, во бојкотот за доделувањето на Нобеловата награда, која годинава му беше доделена на Петр Хандке.

Ваквата одлука предизвика бурна реакција во Приштина и Тирана, но и на други места. Одлуката ја критикуваше јавно и познатата новинарка на Си-Ен-Ен Кристијан Аманпур. Критичарите тврдат дека Австриецот не само што своевремено застанал на страната на Милошевиќ, туку не го признава геноцидот во Сребреница.

Но одлуката Македонија да го бојкотира доделувањето на Нобеловата награда за литература го искоментира градоначалникот на општина Центар кој вели дека министерот за надворешни работи Никола Димитров е идиот.

Саша Богдановиќ очигледно не го одобрува потегот на македонската дипломатија, кој за многумина беше контроверзен.

И повторно со својот идиотски потег! напиша Богдановиќ во коментар на социјалните мрежи.

Инаку вчера и српскиот претседател Александар Вучиќ изрази револт поради ваквата одлука и упати порака до македонската Влада и рече дека треба да си ја гледа својата работа. Тој упати порака и до Србите во Македонија.

-Нека си ја гледаат својата работа, но со бојкотот им покажаа на Србите во Северна Македонија како и за кого да се определат и за кого треба да гласаат. Мислам дека нивниот проблем(на Владата во С. Македонија) е многу поголем отколку нашиот, порача Вучиќ.

Инаку во октомври Комитетот за книжевност на Кралската шведска академија на науките истакна дека  ,Нобеловата награда не може да му биде одземена никому, па ниту на австрискиот книжевник Петер Хандке, бидејќи таква можност не е предвидена во статутот“.