Во изминатите години активно работите како професор по пеење на Факултетот за музичка уметност. Колкав е интересот од младите пејачи да студираат пеење и дали може да се надеваме на нови квалитетни имиња на нашата сцена?

Интересот е огромен, но сепак пресуден е квалитетот. За кратко време со останатите професори од одделот за популарни жанрови успеавме да направиме светска програма, по терк на најпознатите факултети за музика во светот. Целта не е само да бидат добри пејачи, гитаристи или басисти, туку да навлезат во секоја пора на музиката и да станат комплетни, писмени музичари.

Се чини дека имаме константен недостаток на нови песни и спотови. На што мислите дека се должи (ако може да се нарече) кризата на македонската сцена и како може да се надмине оваа состојба?

Да биде иронијата поголема, во ‘90тите години, кога се’ уште немавме толку добро развиена музичка продукција како денес, имаше експанзија на музички хитови, спотови, фестивали. На сите радија се слушаа македонски песни, во дискотеките гостуваа македонски пејачи, на телевизиите пуштаа спотови од македонски изведувачи. Зошто денес има криза? Лесно е да се одговори. Пуштете неколку радија и телевизии и слушнете/видете колку македонски песни се пуштаат, колку топ-листи има, колку музички емисии има. Можеби и има, ама не за македонските пејачи.

Голем дел од нашите таленти бараат успех во странските телевизиски шоуа. Сметате ли дека токму во тие емисии е иднината на успесите на овие млади таленти?

Ги разбирам младите и ги поддржувам. Што би правеле инаку?! Каде да ги пласираат своите песни? Одговорот е сличен како на претходното прашање.

Политичката нестабилност во државата влијае врз многу области и дејности. Како влијае константната политичка криза во изминатите години врз работата на уметниците и естрадните работници?

Секако дека негативно влијае, затоа што постојано сме под некаков стрес. Еве прост пример: одиме на натпревар некаде во странство (музичари, спортисти, сеедно). Еден Италијан, Германец или Француз е сместен во луксузен хотел, со придружба од доктори, професори и цел тим зад него. Тој е должен да мисли само на настапот. Да не зборуваме за условите во кои вежбал и се подготвувал за натпреварот. Еден Македонец едвај собира пари за котизација, бара начини да се смести барем на 30 км од местото на натпреварот, неретко се сместува кај роднини и пријатели, оди до сала со градски автобус или метро, а понекогаш и пеш. Верувајте, кога ќе дојде време за настап, ние сме уморни од сите пропратни работи! И затоа, кога некој Македонец ќе биде на врвот во некој спорт или музички натпревар, треба сите да се радуваме! Убедена сум можеме да се носиме рамо до рамо со светските уметници и спортисти, но едноставно уште од старт ни се потсечени крилјата.

Чувствувате ли некаков „молк“ меѓу јавните личности за актуелните случувања во државата и на што мислите дека се должи тоа?

Мислам дека се должи на некаков страв, барем такво чувство имам. За жал, сите овие години не научивме вистински да ги вреднуваме нештата. За ѓубрето во нашиот двор не ни е никој виновен. Мораме да почнеме да работиме на себеси, ако сакаме да бидеме подобри. За почеток, доволно е да почнеме да ја чуваме животната средина и да се одучиме од праксата да фаќаме врски.

Сметате ли дека „Северна Македонија“ е ферско решение за името на нашата држава? Кој е Вашиот став?

Нема ферско решение за нешто што е наметнато. Поентата е дека народот никогаш не побарал промена на името, а ова што ни се случува го правиме под присила. Грција да ни кажува како ќе го употребуваме името Македонија, таа да ни ги цензурира учебниците, да ни кажува кои знамиња смеат да се веат… И најстрашното, ударот врз македонското малцинство. И покрај нашиот мирољубив карактер и добра воља, на барањата им нема крај! Да не е малку превисока цената? Бугарија е долги години во НАТО и ЕУ, па се’ уште имаат помали плати и пензии од нас. Повторно се вртиме во тој магичен круг. Јасно ми е дека сме беспомошни, сами и уморни од долгогодишни уцени и блокади, но доколку сакаме вистински промени, тие треба да започнат од нас самите! Можеме да ја направиме Македонија прекрасна ако вистински ја сакаме!