Пратеничката Анета Симеска – Димоска (од Македонски Брод) ги изрезили за сите пари предизборните ветувања на Шеќеринска за независност на Собранието. Имено, за третиот по ред поднесен предлог-закон за антикорупциската комисија, иако било договорено да изгледа дека е иницијатива на група пратеници на СДСМ, таа призна дека законот им го спремиле и им го дале од Владата.

Првин владата по сегашниот закон за антикорупциска комисија распиша оглас за избор на членови на комисијата. Потоа, откако следуваа критики дека на власта не и се брза со функционалноста на оваа комисија, владата до собранието поднесе нов предлог закон. Истиот беше поднесен во редовна процедура, а самото каснење на владата значеше дека овој закон нема да помине во Јануари, а со тоа нема ниту да има антикорупциска комисија за време на претедателските избори во 2019-та. Неколку амбасадори на ЕУ му ја пренеле својата загриженост на премиерот Заев за ваквата лежерност во борбата против корупцијата и рекле дека не се сигурни дека Македонија ќе добие датум за преговори, доколку се продолжи неефикасно. Тогаш власта се сетила. Заев, Дескоска и Османи решиле да го известат Собранието дека го повлекуваат предложениот владин закон за антикорупциска комисија, а им дале налог на пратениците да поднесат нов закон по скратена постапка, за да се усвои набрзина, пред Нова Година. 

За доброволци дека ќе подготват нов закон за антикорупција се јавиле пратениците од СДСМ, Анета Симеска Димоска, Сашко Костов, Јагода Шахпаска и Снежана Калеска Ванчева, како и Артан Груби од ДУИ. Паричката да го промовира новиот предлог-закон за анти-корупциска комисија пред пратениците и се падна на неискусната и збунета пратеничка Анета Симеска Димоска. Таа денес зеде збор, зеде ливче на кое најверојатно и го напишале и говорот и на пратениците им објасни дека “законот за корупција беше изготвен во еден инклузивен процес во министерството за правда, а бидејќи роковите пред изборите се кратки, го предлагаме по скратена постапка“. Појасно признание од ова дека предлог-законите потпишани од пратениците на СДСМ и ДУИ им ги пишуваат во владата, не можеше да се добие.

Пред изборите во 2016-та година, Шеќеринска одржа прес конференција токму пред Собранието и кажа дека СДСМ како власт ќе гарантира поголема одговорност на пратениците и ќе се спречи претворање на Собранието во гласачка машина за потребите на власта. “Имаме план во којшто јасно стои дека скратените процедури за носење на закони во Собранието се лоши процедури. Затоа ќе ја ограничиме употребата на оваа скратена постапка, и ќе ја направиме исклучок наместо правило. Сметаме дека само со вакви мерки ќе можеме да ја вратиме, силата, значењето и довербата во Собранието на Република Македонија. Само на таков начин ќе имаме силно Собрание кое ќе биде во состојба да ја контролира извршната власт.“ 

Со својот краток говор, релативно непознатата пратеничка од СДСМ, Анета Симеска Димоска, го потврди токму спротивното, дека пратениците на власта остануваа само гласачка машинерија, без свој интегритет, но за малку лични придобивки се расположени да гласаат и да читаат се што ќе им сервира владата и министерствата, а дека предизборните ветувања на Шеќеринска биле само празни зборови. И покрај се, редно е оваа пратеничка Анета да добие мала благодарност што несакајќи ги разобличи предизборните лаги на Радмила.