Државниот инспекторат за земјоделство [ ДИЗ ] одзеде 73 рибарски мрежи и 370 парчиња белвица со вкупна тежина од 33 килограми од 13 рибокрадци затекнати во Охридското Езеро.

Прекршен е Законот за Државен инспекторат и на Законот за рибарство и аквакултура и на секое лице ќе му биде издаден прекршочен платен налог во висина од 500 евра.

Овластени лица од ДИЗ во вторникот [ 14-ти август ] извршиле вонредна контрола на потегот над струшките села Калишта и Радожда при што во водите на Охридското Езеро кај Калишта во различити правци од риболовната вода биле затекнати 13 физички лица распоредени во седум кајчиња што се движеле и поседувале недозволен риболовен алат.

При пребарување од езерото биле извадени вкупно 73 рибарски мрежи со димензии на окца од 26 мм [ 40 парчиња ] и 24 мм [ 33 парчиња ] со поединечна должина на мрежа од 50 метри или во вкупна должина од 3.650 метри. Исто така од водите биле извадени 370 парчиња охридска белвица во количина од 33 килограми.

Направен е записник за акцијата и заедно со целокупниот риболовен алат и риби се предадени на ДИЗ. По комплетирање на Предметот од страна на ДИЗ ќе бидат изготвени 13 записници со констатирани прекршоци и на секое лице ќе му биде издаден по еден прекршочен платен налог во висина од 500 евра.