Српскиот претседател Александар Вучиќ по средбата со македонскиот претседател Стево Пендаровски во Прохор Пчински изјави дека се воодушевил кога слушнал луѓе од Македонија кои зборуваат на македонски јазик.

-Навистина бев воодушевен утрово кога тука видов луѓе од Македонија кои зборуваат на македонски јазик. Ние Србите, како што знаете, ги сакаме Македонците и го сакаме македонскиот јазик и не мислиме дека не постои или не знам што. Напротив, одлично го разбираме македонскиот јазик како што знам дека и вие го разбирате и го зборувате српскиот јазик. Немам никаков проблем да кажам дека ние сме не само пријатели, туку дека како народ имаме братски односи и во секој случај, верувам дека тие односи и натаму ќе се развиваат, рече Вучиќ.

Тој додаде дека Србија и Македонија веќе немаат отворени прашања.

-Веќе немаме никакви отворени прашања. Ние Србите ги сакаме Македонците, ја сакаме  Македонија. Ништо не бараме и ништо не ни е потребно, освен уште повеќе и подобро да соработуваме. Ги немаме ние тие ситни пречки „кој што кому пред или внатре му кажал, му покажал или не, рече Вучиќ.