Откако денеска Горан Трајковски поднесе оставка од директорската функција во Дирекцијата за заштита на личните податоци, сега веќе е познато и каде ќе продолжи со работа.

Како што пренесува Прес 24, Трајковски заминува од функцијата директор на Агенцијата за заштита на личните податоци, за да биде нов генерален директор на Еуростандард банката.

Трајковски за прес 24 изјавил само дека заминува на друга функција, но не потврдил дека се работи за Еуростандард банка.

Трајковски за Плусинфо навести дека ќе оди на друга функција, но одби да открие детали. Тој само кусо ни изјави да почекаме да заврши со оставката.

Трајковски во оставката, доставена во Собранието во петокот, пишува дека од лични причини си оди од ДЗЛП.

Во оставката се заблагодарува на довербата да биде избран за директор, во како што вели, период кога Македонија се соочувала со тешки повреди на приватноста, намалена доверба на граѓаните во институциите, што било констатирано и од експертите предводени од Рајнхард Прибе. Инаку Трајковски беше назначен за директор на Дирекцијата за заштита на личните податоци на  11 јануари 2016 година.

„Во изминатиот период раководејќи со Дирекцијата за заштита на личните податоци силно помогнат од вработените, Собранието и соодветните владини институции успеавме да покажеме и докажеме дека слабостите се препознаени и истите согласно најдобрите европски практики во областа на заштитата на личните податоци знаеме и можеме да ги поставиме согласно европските вредности“, пишува меѓу другото Трајковски во оставката.