Ќе се разговара да се осигураат 80 гласови, ако треба колективно, ако треба индивидуално и мора пратениците да ја преземат одговорноста врз себе, па дури и по цена на политичката кариера, изјави Артан Груби во вечерашното гостување во телевизија Телма.

ДУИ претпочита прашањето за уставните амандмани да се реши во Собранието. Се уште има простор да се седне и да се договори решение. –  изјави пратеникот Артан Груби во Топ Тема на ТВ Телма во врска со можноста за предвремени избори ако не се постигне договор со опозицијата за промена на Уставот.

Според шефот на кабинетот на претседателот на ДУИ и актуелен пратеник, има надеж да се достигне потребното 2/3 мнозинство.

По прашањето на предвремени избори, ние претпочитаме прашањето да се реши во Собранието. Сметавме дека нема потреба од рефрендум и сметавме дека пратениците имаат мандат добиен на избори тоа да го направат во Собранието. Уште има простор да се достигне до 80 гласа за усвојување на уставните амандмани и во наредните денови ќе работиме со нашите колеги од опозицијата да го постигнеме тоа. – рече Груби.

Ќе се разговара да се осигураат 80 гласови, вели Груби, “ако треба колективно, ако треба индивидуално и мора пратениците да ја преземат одговорноста врз себе, па дури и по цена на политичката кариера”.

Во ДУИ уште не се размислувало за избори со заеднички листи на актуелната власт. Ние сега размислуваме за храбри пратеници од ВМРО – ДПМНЕ кои би се приклучиле на мнозинството во одлучувањето по ова прашање. Сметам дека во моментов има простор да се седне и да се договори. Ако има подготвеност да се гласа и што да се добие за да се гласа, ајде да седнеме и да се договориме. – истакна Артан Груби.