Две лица се исчезнати, а најмалку 30 лица, од кои четворица потешко, се повредени во експлозија на улицата Сен Жак во прометниот кварт Латински во центарот на Париз во средата, соопшти полицијата, наведувајќи дека експлозијата најверојатно била предизвикана од истекување гас.

По експлозијата се урнала фасадата на зградата во која се наоѓа дизајнерското училиште на Американската академија во Париз, а пожарот зафатил и неколку околни згради.
Ројтерс јавува дека спасувачите трагаат по две лица за кои се стравува дека се затрупани под урнатините.

Очевидци опишаа заглушувачка експлозија, проследена со џиновска огнена топка која се издигна над покривите на зградите на улицата Сен Жак, недалеку од катедралата Нотр Дам и паркот Луксембург.

Припадниците на француската армија помогнаа да се воспостави безбедносен обрач околу местото на несреќата, а повеќе од 200 пожарникари учествуваат во спасувачката операција.