Телото на етничкиот грк од Албанија, Константинос Кацифас, кој пред 11 дена беше убиен во престрелка со припадници на албанската специјална полициска единица „Ренеа“, вчера беше предадено на неговото семејство, а денеска е погребан.

На погребот покрај членовите на семејството, присуствуваа жители на селото, Грци од Албанија, како и Грци од Грција. Меѓу присутните можеа да се забележат и грчкиот пратеник од Нова демократија, Савас Анастадиас, како  и лидерот на партијата на грчкото малцинство во Албанија, Партијата за заштита на човековите права, Вангел Дуле, кој рече дека вистината за убиството на Кацифас мора да излезе на виделина.

Погребот се претвори и во еден вид ,,политичка порака‘‘, бидејќи можеше да се забележи голем број на грчки знамиња, знамиња на кои беше истакнато ,,Македонија е грчка‘ и извици од истиот фолклор. 

Убиството на Кацифас предизвика тензии во грчко-албанските односи, па грчкиот заменик министер за надворешни работи се закани дека и преговорите меѓу двете земји кои се водат за повеќе прашања ќе зависат од истрагата околу настанот во Буларат.