Македонската жива легенда Велимир Џаровски Џаро кој е познат по тоа што во својот живот има наместено повеќе од 100 натпревари, изгледа се уште не се откажува од својата работа.

Имено тој пред две недели го наместил последниот натпревар, пренесуваат српските медиуми.

Иако се чини дека е во поодминати години па многумина мислеа ќе се откаже, сепак за српските медиуми Џаро откри дека и понатаму мести натпревари, а последниот го наместил пред само две недели и од него заработил 13.000 евра.

Џаро открива дека натпреварот бил дел од Мундијалот во ракомет до 19 години кои се играше во Скопје.

„Зошто ви е чудно тоа што местам натпревари? Па, тоа е моја работа, моја професија исто како и вие што си ја работите вашата, јас си ја работам мојата. Во минатото заработував повеќе, а сега нешто помалку. Пред две недели добив 13.000 евра затоа што не ми беше дозволено да уплатам поголем износ. Стануваше збор за ракометен натпревар од Мундијалот во Скопје до 19 години. Полесно се мести во спортовите кои не привлекуваат толку внимание, не се крева голема прашина“, изјави Џаро.

Инаку Џаро е познат и како менаџер на легендарните Здравко Чолич, Мишо Ковач, Маја Оџаклиевска, покојниот Оливер Драгоевич, Бјело Дугме и други естрадни ѕвезди, но никогаш пред јавноста не сокрива дека главната мотивација му се парите.