Заменик – помошникот на Државниот секретар на САД за Европа и Евроазија – Метју Палмер ќе престојува во три дневна посета на Македонија.

Палмер во основа е Директор на бирото за прашања за земјите од југоисточна Европа како заменик – помошник на Државниот секретар на САД а во Македонија пристига денес како што е наведено за да ја искаже поддршката на САД за договорот од Преспа што земјата го постигна со Грција како и за прогресот на земјата кон членството во НАТО и во ЕУ.

Палмер ќе учествува на прославата за Илинден во Крушево – каде што годинава ќе се обрати претседателот Ѓорге Иванов. Покрај средбата со Иванов предвидено е Палмер да се сретне со премиерот Зоран Заев но и со сите претседатели на политички партии  како и со претставници на локалните власти надвор од Скопје.

Неофицијално улогата на високиот гостин од САД ќе биде да изврши притисок врз политичките партии да постигнат политички договор за референдумското прашање и да го убеди претседателот на ВМРО – ДПМНЕ да не го бојкотираат претстојниот Референдум за промена на името.