САД утре ќе објават нови санкции кон Русија во координација со земјите од Г7 и Европската унија, според член на администрацијата на американскиот претседател Џо Бајден.

Тој за Си-Ен-Ен изјави дека сеопфатниот пакет „ќе наметне значителни трошоци за Русија и ќе ја испрати понатаму на патот на економска, финансиска и технолошка изолација“.

Новиот пакет санкции ќе ги забрани сите нови инвестиции во Русија, ќе ги зголеми санкциите за финансиските институции и државните претпријатија во Русија и ќе ги санкционира претставниците на руската влада и членовите на нивните семејства.

„Овие мерки ќе ги деградираат клучните инструменти на руската државна моќ, ќе наметнат акутна и непосредна економска штета на Русија и ќе ја повикаат на одговорност руската клептократија која ја финансира и поддржува војната на Путин“, рече претставникот.

„Овие мерки ќе бидат преземени во чекор со нашите сојузници и партнери, демонстрирајќи ја нашата решителност и единство во наметнувањето невидени трошоци за Русија за нејзината војна против Украина.“

Официјалниот претставник додаде: „Веќе заклучивме дека Русија извршила воени злосторства во Украина, а информациите од Буча се чини дека покажуваат дополнителни докази за воени злосторства.

И како што рече претседателот, ќе работиме со светот за да обезбеди целосна одговорност за овие злосторства. Една од тие алатки се санкциите – и ние интензивно работиме со нашите европски сојузници на дополнителни санкции“.