Промени во владиниот кабинет подготвува Алексис Ципрас според грчките медиуми а реконструкцијата би можела да се случи  во следните денови.

Ставот на грчката влада е дека реконструкцијата на владата не се најавува па затоа и не постои официјална информација а дел од медиумите кај јужниот сосед веќе шпекулираат за можните промени во кабинетот на Ципрас.

Според нивните информации неколку министри е сигурно дека ќе останат на нивните досегашни позиции а меѓу нив се и министерот за надворешни работи Никос Коѕијас како и министерот за одбрана и коалиционен партнер Панос Каменос и министерката за труд Ефи Ахциоглу.

Доколку реконструкцијата на владата не се случи во следните денови веројатно е дека ќе биде пред Меѓународниот саем во Солун што започнува на 8-ми септември а каде свое обраќање ќе има и Ципрас.

На саемот што се одржува секоја година на почетокот на септември – традиционално грчките премиери имаат говори во кои ја соопштуваат владината програма за следниот период.