Петре Шилегов, денеска оствари средба со делегација од збратимениот германски град Нирнберг, која беше предводена од градоначалникот Улрих Мали.

Според информациите од Град Скопје, Шилегов оствари средба со градоначалникот Улрих Мали, откако претходната година Петре Шилегов престојуваше на работна посета на Нирнберг каде што Скопје учествуваше на 14. Безграничен фестивал на збратимени градови.

Денеска градоначалниците дискутирале за соработката меѓу двата збратимени града и истата ја оцениле како одлична, со задоволен број на реализирани проекти и активности во областа на културата, младинската и спортската размена и противпожарната заштита.

„Делегацијата од Нирнберг денеска присуствуваа и на официјалното доделување на донација на градинката ‘8 Април’ во општина Шуто Оризари, а подоцна делегацијата треба да ја посети и канцеларијата на ‘Урбана лабораторија на Скопје’ (Skopje Urban Living Lab) во Старата скопска чаршија, која е отворена во рамките на европскиот проект ‘РОК’ – Регенерација и оптимизација на културното наследство во креативните градови (ROCK)“, информираат властите од град Скопје.

Добрата соработка помеѓу Скопје и Нирнберг датира од 1963 година, кога овој Нирнберг се вклучи во помошта за Скопје по катастрофалниот земјотрес.