Пратеникот на ДУИ и шеф на кабинетот на претседателот Али Ахмети, го демантираше колегата Бранко Маноиловски, дека искажал личен а не партиски став.

Пратеникот на ДУИ, Бранко Маноиловски, побара амнестија за обвинетите функционери на ВМРО – ДПМНЕ за ланскиот упад во Парламентот.

Од говорницата тој рече дека амнестијата за функционерите на ВМРО – ДПМНЕ би била помалку штетна за државата отколку неуспехот на Преспанскиот договор.

Но, сопартиецот на Маноиловски, Артан Груби рече дека ставот на пратеникот не е партиски, туку личен.

„Како што вие имате право на лично мислење и господинот Бранко Маноиловски има право на лично мислење кое не го претставува ставот на парламентарната група на ДУИ, а уште повеќе на ДУИ како политичка партија“. – рече Груби.

На вчерашната пленарна седница не се појавија пратениците на ВМРО – ДПМНЕ, Саше Василевски и Љубен Арнаудов, обвинети за 27 април, кои беа ослободени од притвор. 

Во меѓувреме, нивните колеги ги повлекоа сите процедурални говори како револт кон Талат Џафери, кој го одби барањето на лидерот на ВМРО – ДПМНЕ, Христијан Мицкоски, да им се обрати на пратениците.

Неофицијално, мнозинството планира во петок на пладне иницијативата за уставни измени да ја стави на гласање.